Back ويليام بيرد Arabic ويليام بيرد (ملحن) ARZ William Byrd Catalan William Byrd Czech William Byrd Welsh William Byrd Danish William Byrd German Ουίλιαμ Μπερντ Greek William Byrd English Wiliam Byrd Esperanto
William Byrd | |
|---|---|
 | |
| Agtergrondinligting | |
| Gebore | 1540 of 1543 Lincolnshire, Engeland |
| Sterf | 14 Julie 1623 Stondon Massey, Essex |
| Genres | Renaissance |
| Beroep(e) | Komponis |
William Byrd (/bɜrd/; * 1540 of 1543 in Lincolnshire, Engeland; † 14 Julie 1623 in Stondon Massey, Essex) was die beduidendste Engelse komponis van Renaissance-musiek. Byrd het sy werke in die musikale vorme van sy tyd geskryf, waaronder verskillende variante van sakrale en wêreldlike polifonie, klawermusiek in die styl van die sogenaamde Virginaliste-skool, orrel- en consort-musiek. Sy psalms, motette en madrigale word by die gewildste komposisies van die 16de eeu gereken.
Baie van Byrd se komposisies het 'n sterk emosionele karakter aangesien hulle temidde van die politieke, godsdienstige en maatskaplike woelinge van die Tudor-tydperk ontstaan het. Byrd was 'n diep, vrome aanhanger van Rooms-Katolisisme sodat van sy belangrikste werke, veral sy missiklusse, in die regeringstyd van Elizabeth I nie in die openbaar opgevoer kon word nie, maar eerder tydens privaat of selfs geheim kerkdienste gesing is.
Byrd het nogtans die vertroue van die koningin geniet en het sedert 1572 saam met 'n bekende komponis, Thomas Tallis, as orrelis van die Koninklike Kapel (Chapel Royal) te Londen gefungeer. Koningin Elizabeth I het aan Tallis en Byrd selfs die gemeenskaplike monopolie op die druk van notasies verleen.